70 saal se zyada umra ke buzurgon ko ₹5 lakh tak muft ilaj, Ayushman Vay Vandana Card ghar baithe banwayen

70+ buzurgon ke liye kya hai Ayushman Vay Vandana Yojana?

Agar aapke ghar me mata-pita ya dada-dadi jinki umra 70 saal ya isse zyada hai, to unke liye kendra sarkar ki health insurance scheme ‘Ayushman Vay Vandana Yojana’ bahut kaam ki hai. Ye yojana Ayushman Bharat - Pradhan Mantri Jan Arogya Yojana (AB-PMJAY) ka hi vistaar hai. Iski shuruat 29 October 2024 ko hui thi.

Is article me hum is yojana ke baare me saral bhasha me janenge - kaun patra hai, kitna cover milta hai, aur card ghar baithe kaise banega.

Yojana kis ke liye hai?

Ek baat dhyan rahe ki Ayushman Yojana aur Ayushman Vay Vandana Yojana dono ek hi parivar ki yojanaen hain, magar patrata ki shartein alag-alag hain.

Is yojana ka labh lene ke liye sabse zaroori shart umra hai. Vyakti ki umra 70 saal ya usse zyada honi chahiye. Umra ka verification Aadhaar card me darj janmatithi ke aadhar par kiya jayega.

Is yojana me parivar ki salana aamdani, gareebi rekha ya samajik-aarthik sthiti ki koi shart nahi hai. Jabki Ayushman Yojana me hoti hai.

Niji health insurance ya Karmchari Rajya Beema (ESI) ka labh lene wale 70 saal ya usse zyada umra ke log bhi is yojana me shamil hain.

Agar koi buzurg kendra sarkar ki CGHS, ECHS ya CAPF jaisi sarkari swasthya yojana ka labh le raha hai, to use apni maujuda yojana ya Ayushman Bharat me se kisi ek ko chunna hoga.

Yojana me naam judwane ke liye Aadhaar based e-KYC zaroori hai. Rashtriya Swasthya Pradhikaran (NHA) ke FAQ ke mutabik, namankan ke liye Aadhaar hi zaroori dastavez hai.

Kitna medical cover milta hai?

Ayushman Vay Vandana Yojana me har saal 5 lakh tak ka swasthya cover milta hai. Halanki, yahan ek zaroori baat samajhni chahiye.

Agar parivar pehle se Ayushman Bharat PM-JAY yojana me shamil hai, to us parivar ke 70 saal ya usse zyada umra ke buzurgon ko apne liye alag se 5 lakh tak ka atirikt top-up cover milta hai. Ye rakam parivar ke 70 saal se kam umra ke sadasyon ke sath share nahi karni padti hai.

Jabki, jo parivar pehle se PM-JAY me shamil nahi hain, unme 70 saal ya usse zyada umra ke patra buzurgon ko parivar ke aadhar par salana 5 lakh tak ka cover milta hai.

Ye cover aspatal me bharti hokar karaye jane wale tay ilaj ke liye hai. Isme general medicine, surgery, haddiyon, dil aur cancer se jude ilaj sahit kai tarah ki chikitsa prakriyaen shamil hain. Health Benefit Package me 27 medical speciality ke tahat 1,961 prakriyaen shamil hain. Dialysis, heart angioplasty, stroke aur ghutna ya koolha badalne jaisi prakriyaen bhi patrata aur package ke mutabik cover ho sakti hain.

Dhyan rakhein ki ye har tarah ki dawa, janch ya samanya OPD visit ke liye khula 5 lakh ka cash nahi hai. Scheme ka fayda empanelled aspatalon me tay package ke tahat bharti se jude ilaj ke liye milta hai. Matlab aapko aspatal me bharti hona zaroori hai.

Ghar baithe banega Ayushman Vay Vandana Card

Ab card banwane ke liye har baar sarkari daftar jane ki zaroorat nahi hai. Ise aap online bhi ghar par mangwa sakte hain ya WhatsApp ke jariye bhi aavedan de sakte hain.

WhatsApp se aavedan ka tareeka

Sabse suvidhajanak tareeka WhatsApp se aavedan karna hai. Iske liye bas aapko neeche diya gaya process follow karna hai.

Apne mobile me sarkari Ayushman Sarathi WhatsApp number (+91) 7290823838 save karein. Is number par WhatsApp se Hi likhkar bhejein. Chatbot me jo vikalp aayenge usme Ayushman Card aur 70 saal se zyada umra ke nagrikon ke liye Vay Vandana Card se juda vikalp chunein. Aage diye gaye nirdeshon ka palan karein. Aavedan ya e-KYC ki prakriya ke liye aadhikarik portal ya app par bheja ja sakta hai. e-KYC poora hone aur aavedan manzoor hone ke baad card download kar lein.

Yeh WhatsApp seva 24 ghante uplabdh hai. Iske jariye patrata janchne, card ke liye aavedan karne aur card download karne jaisi suvidhaen di gayi hain.

Card download karke uska print nikalwaya ja sakta hai. Zaroorat padne par nazdeeki Common Service Centre (CSC) ya listed aspatal se bhi madad li ja sakti hai.

Online portal ya app se kaise karein aavedan?

Agar aap WhatsApp ke bajaye seedhe website ya app se card banwana chahte hain, to ye tareeke apna sakte hain.

Website se aavedan karna hai to https://beneficiary.nha.gov.in/ par jayein. Khud ke liye Beneficiary ke taur par login karein. Kisi aur ke liye bhar rahe hon to Operator chunein. Mobile number aur OTP ke jariye log-in ki prakriya poori karein. Patra varishth nagrik ka detail khojein aur zaroori jankari bharein. Aadhaar based e-KYC poori karein. Aavedan manzoor hone ke baad Ayushman Vay Vandana Card download karein.

Ayushman App se aavedan karna hai to pehle mobile me aadhikarik Ayushman App download karein. App kholkar patrata aur labharthi se judi jankari bharein. Aadhaar ke jariye e-KYC ki prakriya poori karein. Prakriya poori hone par card download karein.

Iske alawa, patra vyakti nazdeeki Common Service Centre (CSC) ya Ayushman Yojana se jude aspatal me jakar bhi namankan kara sakta hai.

Ilaj ke liye koi waiting period hai?

NHA ke FAQ ke mutabik, card ke liye namankan poora hone ke baad labharthi pehle din se hi ilaj ka fayda le sakta hai. Yojana me beemari ya ilaj ke liye alag se waiting period nahi rakha gaya hai. Yani pehle se maujood beemari hone par bhi patra vyakti yojana ke niyamon ke anusar ilaj kara sakta hai.

Madad ke liye kahan phone karein?

Agar card banwane, patrata janchne ya ilaj se judi koi pareshani aati hai, to in sarkari helpline numbers par sampark kiya ja sakta hai:

Ayushman Vay Vandana Card Helpline: 1800-110-770
Ayushman Bharat 24x7 Helpline: 14555

Yojana ka labh lene se pehle yeh zaroor janch lein ki jis aspatal me ilaj karana hai, wah Ayushman Bharat PM-JAY ke tahat soochibaddh hai ya nahi.

Disclaimer: Yeh lekh keval jankari aur shiksha ke uddeshya se hai. Yeh kisi yojana me aavedan karne ki salah nahi hai. Card banwane ya ilaj karane se pehle aadhikarik portal, helpline ya empanelled aspatal se maujuda niyam zaroor janch lein. Kisi bhi anjan number par apna Aadhaar OTP share na karein.